النتائج المسبقة لزيارة رئيس الوزراء / مصطفى مدبولى – للشرقية – جريدة وبوابة أخر الاسبوع
أخر الاخبار
أخبار محلية

النتائج المسبقة لزيارة رئيس الوزراء / مصطفى مدبولى – للشرقية

النتائج المسبقة لزيارة رئيس الوزراء / مصطفى مدبولى – للشرقية
كله تمام يا فندم ..
كتب / سعيد الشربينى
………………………

تتزين محافظة الشرقية الآن لأستقبال السيد رئيس الوزراء / مصطفى مدبولى – الذى سيتفقد بعض المشروعات خلال جولة بمدن المحافظة . وكالعادة يهرول الافاقين لتزين الاماكن التى سوف يتوجه لها رئيس الوزراء مع حرصهم الشديد بأخفاء كافة السلبيات مثل القمامة والباعة الجائلين وسرطان التوك توك وتكدس السرفيس بالمواطنين والانفلات المرورى المزمن والطامة الكبرى الابراج المخالفة للبناء ..

وطبعآ أعد هؤلاء خريطة للزيارة المرتقبة تتميز بنوع من التستر والخداع والمداهنة وزيادة فى الحرص قام هؤلاء الحبرتكية بتكميم الافواه التى يمكن أن تحدث شرخآ فى هذه الزيارة واستبعادهم عن محال عملهم منعآ للثرثرة أو محاولة كشف الحقائق . الى أن تنتهى الزيارة بسلامة الله وآمنه والراجل يثنى على المحافظ ورجاله الاوفياء دون أن سمع صوتآ واحدآ يعكر صفو الزيارة .

وبما أننا بعيدين عن سلطان السيد المحافظ وحاشيته ويتطلق من صدورنا صوتآ وطنيآ لا يعرف للخوف طريق ننسلخ من بين هؤلاء الافاقين المتواجدين على كل الموائد فى كل عصر وآوان ونطرح على السيد رئيس الوزراء بعض الملفات الهامة بمحافظة الشرقية لعل وعسى تكون نورآ يهتدى به لمعرفة حقائق الامور على الارض .
وأخطر هذه الملفات سبوبة الابراج المخالفة التى مازالت مستمرة فى البناء بأرض الغشام بالزقازيق والتى لم يتم ازالة ولو برج واحد على الرغم من اهتمام الرئيس بذلك والتشديد بتفعيل القانون ضد من يخالف مهما كان قائلآ : لا أحد فوق القانون . ولكن اعتاد محافظى الشرقية واتباعهم مخالفة ذلك حتى اصبح هؤلاء اصحاب ناطحات سحاب فوق اسطح القانون . فيا معالى رئيس الوزراء اذا كنت تريد أن ترى الحقائق بجد وأن زيارتك هذه مش فض مجالس انزل منطقة الغشام وشاهد بنفسك الواقع الاليم .

ثانيآ : طبعآ اخونا الحبرتكية رسموا لك طريق الزيارة وتفننوا فيه وفرشوه بالورود علشان يشعروك بأنك فى باريس وأخفوا عليك طريق العناء الذى يعانى منه أهل الشرقية كل يوم صباحآ ومساءآ كى لاترى سرطان التكاتك وسيارات السرفيس والمكروباص المنتفخة بالركاب على الابواب والشبابيك وكأن المواطنيين اشباه فئران لاقيمة لهم . وهيفرجوك على اتوبيسات فاخرة من شركات السياحة المتفق معهم الساعة فى الفرجة بالف جنيه ويقولوا لك هى دى اتوبيسات الجمهور شوف غيرنا الوضع الزاى ؟ على طول انت تضحك وتثنى عليهم وتقول ربنا يوفقكم يا مصريين وتشرب البلوظة .

ثالثآ : بلاش تروح المستشفى الان علشان مفهاش مرضى حقيقين اصل تردوهم وجابوا شوية موظفيين مكانهم ونيموهم فوق السراير عقبال ما الزيارة تنتهى ولما تسألهم الحال عامل آيه وازى الصحة هيقولوا لك كله تمام وعال العال والعلاج تمام والناس مش مقصرة فى حاجة خالص ربنا يخلى المحافظ وشلته .
على طول تنبصط وتصفق وتقول هم دول المصريين .

رابعآ : طبعآ ولا د الهرمة مش هيوروك ولا مخالفة واحدة من اللى تمت على الاراضى الزراعية لأنها بتاعت الناس المقربيين اللى كلوا كل البقعة الزراعية بشوية هداية وقبلات وعزومات وخلافه على الرغم من انها جريمة فى حق شعب بأكمله وعلى الرغم من صرخات الرئيس بأزالة كافة التعديات على الاراضى الزراعية وتقديم مرتكبيها الى القضاء . ولكن السيد المحافظ ورجاله عملين طناش علشان الحبايب وطظ فى اى حاجة .

خامسآ : اما موضوع التعديات على نهر النيل فا حدث ولا حرج . طبعآ مش هيمشوك ولاد الهرمة من على كوبرى القنطرة ولا على طريق الصيادين اصل كله تعديات وده هيدايء حضرتك اصل التعديات وصلت منتهاها والمحافظ والرجالة عاملين ودن من طين والتانية من عجين . نهيك عن المحلات اللى اتبنت بفلوس الناس ومازالت خاوية وكل اللى عملوه انهم شوهوا المنظر الجمالى للمحافظة ومازال الباعة الجائليين تفترش عرض الشوارع والطرق ومحدش قادر عليهم .

سادسآ : اثناء زيارة سيادتكم المرتقبة هيلفوا بيك ولاد الهرمة على مجموعة من المدارس واحدة أو اتنين معروفين لكل الزوار والطلبه واقفه فى فنائها من حوالى اسبوع لغاية ما ريق ابوهم نشف وفيهم حالة طوارئ . وساعداتكم هتنبصت خالص منهم وهتقول التعليم فى الشرقية يفوق اللى موجود فى انجلترا . ولكن لو رجلك خدتك شوية على المدارس الحقيقية اللى مش مزيفة هتشوف بلاوى كتير ما بين اهمال وقذارة وزبالة وسوء خدمات وكأنها تشبه اتوبيس شرق الدلتا بتاع زمان .
ولا لو رجلك كدا خدتك عند وكيل اول الوزارة المسيس الذى لايصلح حتى بأن يدير موقف اتوبيس وأسأله ماذا اضاف للعملية التعليمية واداراتها بالشرقية هقول لك انا اضفت المحسوبية والوساطة وخيبة الامل وضياع اجيال قادمة .

سابعآ : لو ربنا كرمك وسألت أهل الشرقية الحال عامل آيه يمكن تراجع نفسك ومتجيش الزيارة دى احسن وخلى الطابق مسطور مهى طول عمر الشرقية مبلية بالمصايب سواء فى المحافظين أو القيادات يعنى مش هتلاقى جديد غير الكذب والنفاق والضحك على الدؤون وبكره تشوف وتروح مبسوط جدآ .
وعلى فكرة احنا عارفين من قبل الزيارة ان التقرير طالع تمام التمام وان المحافظة تحولت الى قطعة من فرنسا فى ظل القيادة الرشيدة .. يا ترى هى رشيدة لسه عايشة ؟؟

( حمى الله مصر شعبآ وجيشآ وقيادة من كل مكروه وسوء )
تحريرآ فى : 28 / 10 / 2018

أترك تعليقك

| | | | | | |